خداع ابليس

موضوع: خداع ابليس 15/6/2007, 2:33 pm

فقالت الحيه للمرأه أحقاً قال الله" ...(تك 3:1) "لأنه (إبليس ) كذاب وابو الكذاب" (يو 8:44)

لقد خدع ابليس حواء فى جنة عدن ومنذ ذلك الوقت وهو يكذب على البشر ليبعدهم عن الله أكثر فأكثر.

فهو يخدع الشباب فيقول: أنت لسه صغير. ابنى الاول مستقبلك واستمتع بشبابك وابقى توب لما تكبروتعجز. وبعدين انت يعنى بتعمل ايه بتقطع رقاب الملايكه. انت مش بتأذى حد.

ويكذب على المسن ويقوله: فات الاوان وضاعت الفرصه. ولم يعد لديك القدره ولا القوه ولا الاهليه. سيب الخدمه دى للشباب . ما انت كل يوم فى القداس امال هتعمل ايه اكتر من كده. الله رحيم هيغفر ليك آثام صباك (ما تقدم وما تأخر).

وللاخرين نق نفسك الاول وبعدين ابقى روح لربنا ده ربنا نور ونار. مينفعش تقرب منه وانت خاطئ اصلك متستاهلش.

ولغيرهم يقول ان الخلاص مش معقول يكون بالسهوله دى تتوب وتعترف وربنا يسامحك ازاى بعد كل المصايب اللى عملتها .

وهكذا يكذب ابليس على الانسان ونسى ان الكتاب بيقول نحن لا نجهل افكاره اى افكار ابليس لأنه زى ما كذب على حواء مازال يستعمل نفس الاسلوب. انه غير مبتكر. والحرب اللى حارب بها حواء فسقطت مازال يستخدمها مع بنى البشر. فأصح ولا تدع ابليس يخدعك فهو الكداب وابو كل كذاب.

كلمة ربنا بتقول لنا ان الله فى اشعياء قال "لست اطيق الأثم والاعتكاف ... فحين تبسطون ايديكم استر عينى عنكم وان كثرتم الصلاه لا أسمع" وابليس يقولك بس صلى وصوم وربنا حنين هينسى كل اللى فات. مع ان الله اللى فاحص القلوب ومختبر الكلى عارف ما فى قلبك و بيقولك ان لم تتوبوا فجميعكم كذلك تهلكون". يعنى توب يا ابنى واترك خطاياك علشان لما تصوم وتصلى الله يقبل صيامك ويسمع ويستجيب طلباتك.

بيقولك ابليس ما فيش امل ربنا يسامحك خطاياك كتيره وصعبه قوى 0 لكن يسوع بيقول دمى يطهر من كل خطيه. "هلم نتحاجج يقول الرب (يعنى ناخد وندى مع بعض) ان كانت خطاياكم كالقرمز تبيض كالثلج. إن كانت حمراء كالدودى تصير كالصوف". ويطمنك ويقولك "القلب المسحق المنكسر لا يرذله الله". و يشجعك كمان ويقولك "من يقبل الى لا أخرجه خارجا". ويرجع ابليس يشكك ويقولك اش ضمنك ان ربنا قبلك ولا حتى سامحك ‘ ما كل مره بترجع تانى تخطى. تقوله التوبه دى كانت من كل قلبى يقولك امال اتنرفست ليه على الاولاد (مع انها ذله مش هو دا اسلوب حياتك) ويفضل يشكك فى توبتك لحد ما تيأس وتبطل تحاول من اصله. الخاطى ييأسه من رحمة و غفران ربنا والتائب يشككه فى توبته وخلاصه.

لكن الرب صالح وكل نفس مشتاقه ترضى ربنا وتبتدى معاه بجد بدايه جديده وحقيقيه‘ تروحله زى ما هى بخطاياها الوحشه والصعبه ومطرح ما انت ارفع قلبك وقول له اخطيت ولست مستحقا ان ادعى ابن ليك سامحنى واصفح عنى هيقولك ينبغى ان امكث اليوم فى بيتك فى قلبك فى اعماقك. سيبنى ادخل حياتك وانا اريحك من كل اتعابك وانسيك الماضى المؤلم والخطيه اللى انا بكرها وكانت سبب موتى على الصليب واللى انا هخليك تكرها زيى لو سمحتلى ادخل حياتك واكون انا المالك حياتك والمتصرف فى كل امورك الصغيره والكبيره لو صدقت انى اقدر اعمل كده (وأكيد انا نفسى اعمل كده) بس اسمح الآن. "اليوم يوم خلاص الوقت وقت مقبول اليوم ان سمعتم صوته فلا تقسوا قلوبكم". انا واقف على الباب وأقرع ان سمع احد صوتى وفتح الباب أدخل .." آمن فقط. صدق. ثق قم هوذا يناديك.

صليبى دا كان بدالك وقبرى دا كان مكانك انا بدمى فديتك وبموتى قد احيتك

تعال تعال تعال تعال الى الآن

قال لى الشيطان خطاياك خلت يسوع ينساك لكنى بنفسى سمعته بيقولى انا وياك

قال لى يسوع تعال بلاش تنظر للحاله انا فى لحظه اغيرك ما عندى حاجه محاله

انا بخطاياى اجيلك وتوبة قلبى أديلك دا انت اللى حبيتنى مين يغفر ذنبى غيرك

يا يسوع الحبيب فادى وأغلى نصيب أديلك كل حياتى عند قدميك سكيب

الرب يهيئ قلوبنا لنتوب توبه صادقه من كل القلب ويستخدمنا كلنا لمجد اسمه العظيم القدوس له كل المجد فى كنيسته من الآن والى الابد آمين. كل سنه وانتم طيبين. الرب يبارك حياتكم.

اختكم فى الرب

إيفيت

موضوع: رد: خداع ابليس 15/6/2007, 2:37 pm

موضوع جميل يااا سمسم

موضوع: رد: خداع ابليس 15/6/2007, 3:08 pm

شكرا يا مجدى للمرور الجميل
ربنا يباركك

موضوع: رد: خداع ابليس 9/7/2007, 6:14 pm

شكرا سامىموضوع رائع
ربنا يبارك حياتك

موضوع: رد: خداع ابليس 30/7/2007, 8:45 pm

شكرآ سامى موضوع جميل

الرب يبارك حياتك